‘Marbhrann’ le Fearghas MacFhionnlaigh (1977)

bhrùchd thu air an talamh mar bholcàno
— Krakatoa poilitigeach

chuir thu air chrith leth an t-saoghail le do dhéineas
a’ leigeadh dheachdairean fa d’ chomhair mar chuilbh Phompeii;
sgeith thu ar-a-mach thairis air Eòrpa mar shruthan dòthach làbha
a’ sgaoileadh dùil na saorsa mar thòth gharg a’ phronnaisg

ach chuir do mhórchumhachd fo’n daorach thu
’s mhùchadh thu le dìobhairt do ghlóirmhiann féin;
ghradchruadhaich do chridhe caoirleaghte
’s chaochladh làbha d’ ar-a-mach ’na chlach fhuar

gidheadh shnàig thu fhathast air adhart mar éighshruth dhubh
a mhion-phronnadh chnàmhan nan cinneach;
’s an sàs nad bhroinn mar mhamot àrsaidh
chìthear corp rag-reòidhte Stàilinn

’s anaman nan nàisean teann-ghréimichte
’na fhiaclan mar chearbanan-feòir;
’s luaithre d’ shàrbheachdan a’ sìor-thuiteam air
d’ ìompaireachd shàmhach mar shneachd air cladh

bhrùchd thu air an talamh mar bholcàno
— ach thug thu ’m bith linn-eighe

~~~

Chaidh an dàn seo fhoillseachadh ri taobh ‘Laoidh nach e do Leninn’ (tdd 124-125) a tha a’ dol leis, ach saoilidh mi gu bheil ‘Marbhrann’ a’ seasamh leis fhèin. Chìthear gun do nochd iad sa bhliadhna 1977, 60mh ceann-bliadhna Rèabhlaid na Ruise.

Fearghas MacFhionnlaigh, ‘Dà Dhàn’, Gairm 98 (An t-Earrach 1977), tdd 124-126.

Tha an dàn-sa ga sgaoileadh air a’ bhlog seo le cead fialaidh a’ bhàird fhèin. Chan ann leamsa a tha na còirichean.

Faodar barrachd de bhàrdachd MhicFhionnlaigh a leughadh ann an Gairm, no sa chruinneachadh aige, Bogha-frois san Oidhche (Carberry: Handsel Press, 1997).